4-1 sigur gegn ÍR í kvöld staðreynd á Malbikstöðinni að Varmá.
Hildur Karitas setti tóninn í upphafi leiks með glæsilegu skallamarki 1-0.
Saga Líf bætti við öðru marki áður en fyrrum leikmaður Aftureldingar og núverandi leikmaður ÍR, Linda Eshun minnkaði muninn rétt fyrir hálfleik.
Í fyrri hálfleik þurftu Hildur Karítas og Katrín Rut að yfirgefa völlinn vegna meiðsla og í þeim síðari fékk Anna Pálína högg á höfuðið og þurfti sömuleiðis að yfirgefa völlinn. Við þetta þurfti liðið smá tíma að ná aftur vopnum sínum og gerði Ariela út um leikinn með þriðja marki Aftureldingar og jafnframt þriðja leiknum í röð sem hún skorar.
Leikmaður ÍR varð fyrir því óláni að skora sjálfsmark í lokin og leikar enduðu því 4-1 okkur í vil.
Afturelding jafnar því FHL á toppi deildarinnar en FHL á leik til góða.
Næsti leikur er í Eyjum á föstudaginn kemur gegn ÍBV.
Áfram Afturelding!
Leikdagur!!
Stelpurnar okkar taka í kvöld á móti ÍR á malbikstöðinni að Varmá kl.19:15.
Okkar stúlkur koma á fljúgandi siglingu inn í þennan leik eftir tvo sigurleiki í röð og sex mörk.
Liðin eru á sitthvorum enda töflurnar í deildinni en ÍR-ingar sitja á botni deildarinnar á meðan okkar stúlkur eru í 2.sæti, þremur stigum á eftir toppliði FHL.
Okkar stúlkur eiga þó harman að hefna en ÍR skellti okkar stúlkum í Lengjubikarnum um miðjan mars fyrr á þessu ári 3-0 í Breiðholtinu og því ekkert annað en sigur til í kvöld i boði til að svara fyrir þann leik.
Hvetjum alla Mosfellinga og velunnara Aftureldingar að gera sér ferð á völlinn og hvetja okkar stelpur til sigurs.
Áfram Afturelding!!
Geggjaður 3-1 sigur í Kórnum á heimastúlkum í HK í baráttuleik.
HK komst yfir 1-0 snemma leiks en okkar stúlkur svöruðu með marki frá Hildi K. Gunnarsdóttur en hún kláraði laglega færið sitt eftir sendingu frá Sögu Líf.
Anna Pálína kom Aftureldingu í 2-1 í síðari hálfleik og undir lol leiks fengum við vítaspyrnu eftir að brotið hafði verið á Hildi innan teigs og á punktinn fór Ariela Lewis og sýndi miklar stáltaugar er hún þrumaði boltanum i netið.
3-1 sigur í toppbaráttuslag staðreynd, okkar stelpur klifra því upp í 2.sætið og skora þrju mörk annan leikinn í röð.
Næsti leikur er á heimavelli næstkomandi mánudag gegn ÍR.
Allir að mæta á völlinn og áfram Afturelding!
Það er leikdagur hjá stelpunum en þær mæta upp í Kórinn Kópavogi í kvöld kl.18:30 og leika þar við HK í Lengjudeild kvenna.
Liðin sitja í 2. og 3.sæti deildarinnar og skilur aðeins eitt stig liðin að en HK hefur verið á mikilli siglingu undanfarið.
Það er því um hörkuleik að ræða í kvöld og hvetjum við alla til þess að mæta í kvöld og horfa á tvö flott knattspyrnulið eigast við.
Áfram Afturelding!
Sannfærandi 3-0 sigur á ÍA á Malbikstöðinni að Varmá í gærkvöldi.
ÍA byrjaði leikinn betur og komust í tvö góð færi á fyrstu 10mínútum leiksins en Elaina sá við þeim í bæði skiptin. Eftir það tóku okkar stelpur meira og meira völdin á leiknum og skoruðu glæsilegt mark þegar Saga Líf lék á varnarmann ÍA og gaf glæsilega sendingu fyrir markið þar sem Hildur kom á ferðinni og skallaði boltan í fjær hornið yfir markmann ÍA, mark á heimsmælikvarða!
Rétt undir lok fyrri hálfleiks fékk ÍA vítaspyrnu en Elaina var vandanum vaxin í markinu og átti frábæra vörslu.
Í seinni hálfleik mættu Aftureldingar stelpurnar tvíefldar og sóttu án afláts. Skoruðu tvö mörk þegar þær Katrín Vilhjálms og Ariela Lewis komu boltanum í net gestanna en mörkin hefðu hæglega getað orðið mun fleiri þar sem heimastúlkur lágu þétt á ÍA sem lágu djúpt á vellinum og reyndu að beita skyndisóknum.
3-0 heimasigur staðreynd sem kom sér vel eftir vont 1-0 tap í síðustu umferð gegn Selfoss. Afturelding lyftir sér upp í 3.sæti jöfn stigum og FHL sem er í 2.sæti en með betri markatölu.
Áfram Afturelding!
Það er leikdagur hja stelpunum okkar er þær taka á móti ÍA í kvöld á Malbikstöðinni að Varmá.
Nágrannaslagur að bestu gerð og baráttan um Hvalfjörðinn og Kjalarnesið í kvöld og því mikið undir!
Liðin sitja í 5. og 6. sæti í deildinni en með sigri geta liðin tilt sér í toppsætin.
Hvetjum alla Mosfellinga til að fjölmenna og styðja stelpurnar okkar!
Áfram Afturelding!
LEIKDAGUR!
Stelpurnar okkar skreppa á Selfoss í rjómablíðu í dag og leika þar við Selfoss í 6.umferð Lengjudeildar kvenna.
Leikurinn er á JÁVERK vellinum á Selfossi og hefst klukkan 14:00.
Hvetjum alla velunnara Aftureldingar að gera sér ferð á leikinn í dag en spáin er vægast sagt góð.
Áfram Afturelding!
LEIKDAGUR!!
Stelpurnar okkar spila í kvöld kl.20:00 á Malbikstöðinni gegn Bestu deildar liði Þróttar í 8.liða úrslitum Mjólkurbikarsins.
Hvetjum alla til þess að koma og hvetja okkar stelpur áfram í bikarnum!
Áfram Afturelding!
1-0 sigur á heimavelli í hávaða roki gegn Fram.
Kaflaskiptur leikur þar sem liðin skiptust á að sækja og fóru illa með sín færi en það var Snæfríður Eva Eiríksdóttir sem braut ísinn á 29’mínútu eftir frábæran spil kafla heimastúlkna og því virkilega skemmtilegt að klára sóknina með marki en Snæfríður átti hnitmiðað skot fyrir utan teig í fjærhornið.
Mikill vindur hafði sín áhrif á leikinn og bæði félög fóru illa með góðar stöður og því 1-0 niðurstaðan.
Með sigrinum tylla okkar stúlkur sér á toppinn í deildinni eftir fimm umferðir.
Næsti leikur er á Selfossi þann 14.júní en skemmtilegt er að segja frá því að Kristín Þóra Birgisdóttir snéri aftur á völlinn gegn Fram eftir að hafa misst af öllu síðasta tímabili vegna meiðsla og þá kom Telma Hjaltalín Þrastardóttir einnig inn á eftir að hafa spilað síðast með Aftureldingu árið 2013.
Virkilega gaman að sjá þær stöllur koma inn á í þessum leik og mætti því segja að þetta hafi verið þrefaldur sigur í lokin.
Við hvetjum alla Mosfellinga til þess að fylgja liðinu eftir og mæta á völlinn, áfram Afturelding!
LEIKDAGUR!
Stelpurnar fá Fram í heimsókn í kvöld á Malbikstöðinni að Varmá kl.19:15
Leikir þessara liða hafa verið jafnir og spennandi undanfarin ár og á því verður engin undantekning í kvöld.
Fram er eina taplausa liðið í deildinni og því liðið sem öll lið vilja sigra.
Spennandi leikur framundan í kvöld svo við hvetjum alla Mosfellinga til að mæta og styðja okkar stelpur til sigurs!
Áfram Afturelding!
Sárt 2-0 tap fyrir austan gegn FHL á kosningardaginn sjálfan.
Það var sumarblíða sem tók á móti stelpunum á Egilsstöðum en 18 gráður og sól bærinn skartaði sínu fegursta.
Keyrt var á Reyðarfjörð þar sem spilað var inni í Fjarðarbyggðarhöllinni.
Þurrt gras og óbærilegur hiti inni í höllinni hjálpaði ekki til að spila fallega knattspyrnu en 0-0 var í hálfleik.
Í stöðunni 0-0 brenndum við af vítaspyrnu og FHL gekk á lagið og kláraði leikinn 2-0 í síðari hálfleik.
Næsti leikur hjá okkar stúlkum er gegn Fram á fimmtudaginn kemur á Malbikstöðinni að Varmá.
Áfram Afturelding!
